Curso d'aragonés Arredol. "Una gambadeta por a luenga aragonesa. Metodo d'autoaprendizache. Incluye diccionario con 3.200 voces."

Sinopsis
Achustau a la ortografía de l Instituto De L Aragones, 2023

Istas cosas siempre prencipian igual... A que no yes capaz d'elaborar un metodo d'autoaprendizache d'a luenga aragonesa?, sin parar cuenta que, a sobén, parellana proposa-trampa se torna en tot un reto y cuasi una custión d'honor ta un aragonés... Que no? Pos agora te vas a enterar tu...

Siga como siga, aquí lo tiens entre as tuyas mans, prebando d'averiguar qué ye ixo de Arredol y si li fa chusticia a o subtítol que diz una gambadeta por a luenga aragonesa .

Nusatros te lo contamos. Arredol quiere estar un metodo ta aprender a fablar y amar a nuestra luenga, ixuplidada en bel caso, y en atros, prou a ormino, refusada u maltratada, cuan no as dos cosas de vez. Una aina que t'habrá de valer ta fer un curso de traza tradicional, ye decir, indo ta clase y fichando como un campión, si ye que asinas lo prefieres; pero, y más que más, ye un metodo que te permitirá iniciar-te y fer-te una ideya prou aproximada d'o que ye l'aragonés, por a tuya cuenta (y risque) y a o tuyo ritmo, a la tuya bola, que dicen os nuestros vecins castellans, porque contas con un amplo vocabulario y modelos de verbos. Pero talment y talment o que te podrá resultar más atractivo, ye que te i trobarás con un apendiz con toz os eixercicios resueltos... Un traste útil si ye que plegas a perder-te u a embolicar-te. A la finitiva, un metodo fresco y, talment, no pas a l'uso. Estructurau de traza platera y an que podrás trobar lecturas dialogadas, eixercicios arrienda y chuegos, muitos chuegos. Un tarabidau ludico-lingüistico que te menará por os camins de l'aragonés sin garra (u poquet) esfuerzo, d'una manera fácil y siempre prebando de no aburrir-te, que ya se sabe, que os idiomas los carga o diaple y que os follez d'as parolas son bien trafucadors. Si lo hemos conseguiu, perfeuto. Pero ixo lo habrá de decir o tiempo y, más que más, vusatros, que lo habrez de patir si ye que tos da la lunada d'empecipiar-lo, rematar-lo y no tos tornaz varrenaus. Ta rematar, a tu, aragonés, que has encertau en agafar ista ferramienta, nomás nos manca que preguntar-te... A que no yes capaz d'aprender aragonés...?