Baitico. "Memoria de la Valle Bielsa"

Sinopsis
El tio Baitico s'ha caracterizato siempre per el suyo amor al belsetán e a la luenga aragonesa, en cheneral. Ixo ye espezialmén meritorio en una persona mayor que vivió uns tiempos difízils, en es que charrar aragonés yera sinonimo de vergüeña e discriminazión. Una vergüeña e discriminazión que a sobén arribaba ta la violenzia fisica, sobre tot en l'ambito escolar.
Per l'argüello tan gran que teneba, e tien, de la suya luenga le valió el premio Libertaz Aragonesas atorgato el 20 de diziembre de 2005 per Chobenalla Aragonesista, rezibindo el galardón de mans d'Emilio Gastón, primer chustizia d'Aragón de la democrazia.
Baitico siempre ha colaborato con es filologos, lesicografos, antropologos e estudiosos que feban investigazions e troballos sobre l'idioma. Brian Mott, la filologa marroquina Amina Rhardisse, Antonio Martínez Ruiz, Ánchel Lois Saludas e Chabier Lozano, Juan José Pujadas mesmo en altros suportes, como Aragón Televisión u l'Archivo Audiovisual de l'Aragonés. De siempre ha ofierto la suya colaborazión en tot e pa toz es que le'n han pedida.
Pero, amés de la fegura de l'autor, qué ye el que nos puede dar iste libro? Un testimonio d'el sieglo XX en-na valle de Bielsa e muta informazión
Per qué fayoren el parador nazional en el cul de Pineta?
Cuán yeran las fiestas de las casas de La Plañera, Arizón e Garrot?
Ta qué s'emplegaba la zenisa de sabina?
Cómo se feban es tellatos de tableta?
Cuán plegó el chabalín ta la valle Bielsa?
Án se feba el millor calso de tota la val?
Por qué no se deixó de fer el carnaval en Bielsa en-nos años de la dictadura?
Quí se comeba la chulla la lavadera?
Cuán e per qué fayoren la carretera ta Bielsa?
Qué ye tener el suenio de las mozas de Montaner?
perque son mutas las preguntas que tienen la suya respuesta en las fuellas d'este libro.